年底選舉賰4個月，除了縣市首長，候選人上濟的就是基層的村長、里長，計共7734席。毋過女性佔無兩成，甚至欲到三分一攏是1个人出來選，等於無競爭對手。台灣婦女團體全國聯合會，今年已經是第四年辦村里長的培訓班，希望搝懸女性的參政比率，也予基層政治參與換新換新。
台北市信義區泰和里里長參選人 連婉彤表示，「阮以前老里長是查晡的，做足濟屆的，毋過我是感覺女性的力量就是愛予逐家看著。」
這幾年台灣女性政治人物比例增加，予人看做是性別平權大進步，不過若看數字，查某立委佔四成外，直轄縣市市議員三成外，抑若村里長干焦16.6%，無夠兩成，根據中選會統計，今年年底村里長有7734席次，毋過女性現任的名額少，村里長閣較有倚三分之一是同額競選，等於無競爭對手，婦全會認為女性比例愛至少有三成，才通改變生態。